الجيل الجديد

 من نهار ولّاو الدراري يربوا الكلاب وحاطين ليهم برنامج تغذية متوازن وواخدينهم كنوع من الترّف الاجتماعي أو تنوع هرموني فاقد للشرعية ..

من نهار ولّاو الدراري يديروا الݣيراتين والترطيبة والكوماج والدّهنة للوجه، وهناك من تحمس ورجع ينتّف الحجبان وزغب الخنافر ويتصوّر بالفيلتر ..
من نهار ولاو الدراري يلبسوا السراول المزّيرين وصباط مونگسان حقير ويتعمّدوا يبينوا السنسلة فالعنق وواخدين الحياة كصورة..
من نهار ولّاو الدراري يديروا الضحك فراسهم بالتصاور مع مراية السّانسور ومراية الحمام ومراية كواليتي القهاوي وشادين التيليفون من الوسط باش يبينوا الكاميرا ديال الآيفون.
من نهار ولّاو الدراري تعجبهم اندومي وطاكوس ويصّوروهم قبل ما ياكلهم ويشربوا عصير بالتِيُّو ..
من نهار ما بقاو الدراري يشربوا قهوة كحلة مسّوسة وتاهوما بداو يتعلموا ينطقوا ميلك تشيك ونسبيرسو والݣغاتان .. 
من نهار ولاو الدراري ماعزيزاش عليهم التّقلية ويعِيفوا العدس بالگديد وينعسوا فالعيد الكبير تا لجوج ..
من نهار ولاو الدراري يتشّكاو من صلة الرحم ومن العلاقات الاجتماعية والتبريكات ديال العيد بالسلام بالوجه.
من نهار رجعوا الدراري ما بقاوش باغيين يضربوا تمارة وبغاوها باردة ودخلوا يشطحوا فالتيك التوك ويطلبوا التفاعل .
من نهار ولاو الدراري يتفاعلوا مع المغنيات وحافظين ليهم كلمات اغانيهم عن ظهر قلب ويرفقوها مع صورة ليهم فالسطوري .. 
من نهار ولّى هادشي وكثر وأصبح ظاهرة ماشي غير حالات شاذة ناشز ..
كثروا العيالات وقلّوا الرجال . وبالتالي أصبح للمرأة شريك موضوعي يتقاسم معها حالتها النفسية ويدعمها لأن تقوّت فتفرعنت فظنت بأن رأيها هو الصواب ..
ترجلوا معانا القلاوي شوية راه الوقت غاديا وكتقاود.
وما على الرسول إلا البلاغ ..